Aug 25
2010
| Parodies by Raj Comics
Posted by: TRENDSTER on Aug 25, 2010
|
Kisi famous work ko imitate karke humorous tareke se dobara banana Parody kehlata hai. 1996 -1997 mey Raj Comics kuch Parodies publish kar chuki hai. Ye parodies kuch Hindi Blockbuster movies par based thi. # - 'Bill waale Dhamkiyan De Jaayenge' (Dil waale Dulhaniya Le Jaayenge),
# - 'Hum Aapke hai Bhow - Bhow' (Hum Aapke hai Kaun),
# - 'Bhaagi Ghar' (Baazigar).
Ye comic strips Nagraj fan club (aur RC fans) ki magazine kay roop mey launch ki gayi thi aur inke Third issue se inka naam 'Fang' rakha gaya. Fang kay first issue mey 'Bhaagi Ghar' kay saath Cherry, Sady, Friendy, ki comic strips chhapi thi. Movie ki story kay saath saath uske songs ki bhi parody ki gayi thi. Kyoki ye RC kay parody mey apni tarah kay pehle efforts thay isliye ye stories aur artworks theek thak thay. Kisi nay RC ki ye parodies padhi hai?
Kya RC ko aage bhi achchhe concepts aur artworks kay saath Parodies publish karni chahiye?
Waise kuch comics kay scenes mey mashoor incidents, films, etc, ki parody ki jaati hai. Celebrities jaise naam aur style waale chhote characters bhi kabhi - kabhi Fighter Toads aur Gamraj ki comics mey khoob comedy karte hai. Ek Bankey Lal ki comic to Ramayan ki parody thi. Mujhe uska naam yaad nahi. To kya aap RC dwara banayi gayi parodies ko aage padhna chahte hai?
Parodies karne kay liye unka subject selection (jis par wo based ho) bahut zaroori hai kyoki galat subject ki comedy se bahut se readers hurt ho sakte hai. For example kai ideologies, cultures, ki drawbacks ko basis bana kar badhiya parodies to ban sakti hai lekin unke content mey kab kisi ka anjaane mey mazaak ban jaaye ya limit cross ho jaaye pata nahi chalta. Shayad isliye hi parodies kum aati hai.
Parodies ko safal banane kay liye 2 baatein bahut important hai. Pehli to yeh ki wo kisi fictional work par based ho, saath hi satire aur parody ko indirect way mey likhne se unka zyada asar bhi hota hai aur writer ko freedom bhi milti hai.
No comments:
Post a Comment