Kuch friends aur fellow comic fans ka kehna hai ki admins unke saath anyay karte hai aur unke dwara ki gayi comics se unrelated offtopic posts hata di jaati hai jabki admins ke achchhe dosto k maamle mey aesa nahi hota. Ye ek galat avdharna hai jispar apna paksh rakhne k liye yeh post kiya jaa raha hai. Is group ke banne k baad se hi comic fans yahan ki gatividhiyon dwara bhartiye comic fans ko paas laane ki kosish ki jaati rahi hai aur Offtopic posts har group mey hoti hai aur members ko close laane mey mahatvapoorna bhumika nibhati hai.
Kai die hard comic fans k janoon, mehnat aur pyaar ki wajah se abhi tak ICUFC FB par Bhartiye Comics se juda sabse bada group hai aur humey ummeed hai ki aage bhi aap sabka saath bana rahega.
Ab humara paksh... 1) - **Offtopic Posts ka Anupaat** Kabhi kabar mahaul badalne ko ki gayi offtopic posts se kisi ko aapatti nahi hai par aksar agar ek hi fan offtopic posts karega tab group ke discussions aur updates par anjaane mey asar padega. Jo fans complain karte hai ki dosro ki offtopic posts kyu nahi hatayi gayi wo ye nahi note karte ki ye doosre log wo offtopic post kitni saari comic related post k baad kar rahe hai aur kitne lambe antraal k baad kar rahe hai (yeh antraal ek fan se doosre fan ki activity k hisaab se badal sakta hai) aur phir khud ki aksar ki jaane waali posts mey se kuch delete ho jaaye to janbujh kar ye tulna karte hai. Tulna karne k liye pehle un fans jaisi posts to kijiye tab mahaul light karne k liye ki gayi aapki offtopic post ka sab khushi se swagat karenge.
2) - **Fake Ids** Kuch fans admins ya doosre members se pehle kabhi huyi behes, jhagdo ko mann mey paal kar rakhte hai aur fake ids se group join kar k admins ki limit test karte jaate hai tab tak jab tak elastic kheench kar toot na jaaye...baar-baar...agar is beech admin ne kuch bol diya ya delete kar diya to apni 12 din purani id se kiye saare kaam ek taraf aur admin k wo 2-4 kaam/screen shots ek taraf...is sabme jo kuch asantusht members waise kum hi aate hai wo admins buraai ka mauka nahi chhodte aur galat jagah, galat tareeke se gussa zahir kar galat niyat se bani fake ids tak ka saath dete hai.
3) - **Communication** Kabhi kahin huyi misunderstanding ko dil mey na paal kar baat karna achchha hai kyoki dil mey reh kar dwesh aur bada roop le leta hai samay k saath. Admins aap sabki tarah comics fans hai, theek dimaag k saakshar log hai aur apni sujh-bujh se nirnay lete hai aur group ko lively rakhne mey, comics ko badhava dene mey khoob mehnat bhi karte hai. Haan, rarely nirnay mey chook insaan hona darshati hai aur har active group mey aesa hota hai. To in chhoti baaton ko dil se na lagakar aage badhiye waise bhi kisi active group par 1-2 weeks pehle huyi post itni neeche jakar gayab si ho jaati hai aur kuch nayi updates, pics, reviews, discussions uski jagah le leti hai...to ek bade group par lambe samay tak rehkar aapka lagataar achchhi posts karna zyada important hai na ki 1-2 baar hui kisi anchahi baat se rusht hokar group hi chhod dena.
- Mohit
No comments:
Post a Comment